اسلام آباد: الیکشن کمیشن نے سیاسی جماعتوں کے انتخابی نشانات کی فہرست ریٹرننگ افسران کو بھجوا دی۔
سیاسی جماعتوں کے انتخابی نشانات کی فہرست جاری، پی ٹی آئی کا نام اور بلا شامل نہیں۔
الیکشن کمیشن نے قومی اور صوبائی اسمبلیوں کے ریٹرنگ افسران کو مراسلہ جاری کیا ہے جس میں 145 سیاسی جماعتوں کے انتخابی نشانات کی فہرست بھجوائی گئی ہے اس میں تحریک انصاف اور اس کا انتخابی نشان بلا شامل نہیں کیا گیا۔
تحریک انصاف سمیت 12 سے زائد سیاسی جماعتوں کا نام انتخابی نشانات والی فہرست میں نہیں ہے۔
ریٹرننگ آفیسرز الیکشن کمیشن کی طرف سے دیے جانے والے انتخابی نشانات 13 جنوری کو الاٹ کریں گے۔
پیپلز پارٹی پارلیمنٹیرینز کو تیر، مسلم لیگ ن کو شیر، پاکستان تحریک انصاف نظریاتی کو بلے باز کا نشان الاٹ ہوا ہے۔
استحکام پاکستان پارٹی کو عقاب، پی ٹی آئی پارلیمنٹیرینز کو پگڑی کا نشان دیا گیا ہے، متحدہ قومی موومنٹ پاکستان کو پتنگ جبکہ تحریک لبیک پاکستان کو گرین کا نشان ملا ہے۔
جمیعت علماء اسلام کو کتاب، جماعت اسلامی کو ترازو کا نشان الاٹ کیا گیا ہے۔
سیاسی جماعتوں کے نامزد امیدوار کو متعلقہ انتخابی نشان الاٹ کیا جائے گا،سیاسی جماعتوں کے انتخابی نشانات کسی ازاد امیدوار کو نہیں ملیں گے۔
الیکشن کمیشن نے ریٹرننگ افسران کو ہدایت کی ہے کہ فہرست میں موجود نشانات کے علاوہ انتخابی نشان کسی امیدوار کو نہ دیے جائیں۔
