اسلام آباد: آئل اینڈ گیس ڈویلپمنٹ کمپنی لمیٹڈ (او جی ڈی سی ایل) نے منگل کو کنر پساکھی ڈیپ (کے پی ڈی) فیلڈحیدر آباد سے پاکستان کے توانائی کے منظر نامے کو مضبوط بنانے کے لیے اضافی پیداوار شروع کرنے کا اعلان کر دیا ہے۔
او جی ڈی سی ایل سے جاری اعلامیے کے مطابق اپنی پروڈکشن آپٹیمائزیشن مہم کے طور پر، او جی ڈی سی ایل نے آپریشنل ترمیمات اوران ہاؤس کمپریشن انتظامات کو لاگو کیا جس کے نتیجے میں کے پی ڈی فیلڈ میں چھ کم پریشر والے کنوؤں سے گیس دوبارہ سسٹم میں شامل ہو گی۔ اس اقدام کے نتیجے میں 16 ملین سٹینڈرڈ کیوبک فٹ یومیہ گیس، 150 بیرل یومیہ خام تیل اور 18 میٹرک ٹن یومیہ ایل پی جی کا متاثرکن اضافہ ہوا ہے۔
11 دسمبر 2023 سے سسٹم میں اضافی حاصل ہونے والی گیس کو بغیر کسی رکاوٹ کے سوئی سدرن گیس کمپنی لمیٹڈ (ایس ایس جی سی ایل) کے نیٹ ورک میں شامل کردیا گیا ہے۔
صوبہ سندھ میں ضلع حیدرآباد سے تقریباً 25 کلومیٹر کے فاصلے پر واقع کے پی ڈی فیلڈ او جی ڈی سی ایل کے پورٹ فولیو میں ایک اہم اثاثہ ہے۔ فی الحال، یہ فیلڈ 1600 بیرل یومیہ خام تیل، 107 ملین سٹینڈرڈ کیوبک فٹ یومیہ گیس، اور 195 میٹرک ٹن یومیہ ایل پی جی پیدا کر رہی ہے۔ امائن سویٹیننگ اور گلائکول ڈی ہائیڈریشن یونٹس کی دو ٹرینوں پر مشتمل ایل پی جی نکالنے کی سہولیات اور متعلقہ یوٹیلیٹیز سے لیس یہ فیلڈ ملک کی توانائی کی ضروریات کو پورا کرنے میں اہم کردار ادا کر رہی ہے۔
تیز رفتار حکمت عملی کے ذریعے تیل اور گیس کی پیداوار بڑھانے کے لیے او جی ڈی سی ایل کا فعال نقطہ نظر قومی توانائی کی سلامتی کے لیے کمپنی کی لگن کو واضح کرتا ہے اور کمپنی کی انتھک کوششیں پاکستان کے لیے پائیدار ترقی اور خوشحالی کو فروغ دینے کے اس کے مشن کے مطابق ہیں۔
