لاہور : مسلم لیگ ن کے قائد اور سابق وزیراعظم میاں نواز شریف اور مسلم لیگ ق کے سربراہ چودھری شجاعت حسین کی 15 سال بعد ملاقات ہو گئی ۔
نواز شریف آج چودھری شجاعت حسین سے ملاقات کیلئے ان کی رہائش گاہ ظہور الہٰی روڈ پہنچے جہاں دونوں رہنماؤں کے درمیان ملاقات 40 منٹ تک جاری رہی۔
نوازشریف کے ہمراہ شہباز شریف ، مریم نواز ، رانا ثناء اللہ ، سعد رفیق ، سردار ایاز صادق اور اعظم نذیر تارڑسمیت پارٹی کے دیگر رہنما بھی تھے۔
نواز شریف اور لیگی قیادت کی آمد پر مسلم لیگ ق کے رہنماؤں نے ان کا استقبال کیا، مسلم لیگ ق کی جانب سے چوہدری سالک حسین، شافع حسین، طارق بشیر چیمہ اور امتیاز رانجھا بھی شریک ہوئے ۔
نواز شریف نے چوہدری شجاعت حسین کی خیریت دریافت کی ، چودھری شجاعت حسین نے نواز شریف کے لئے نیک خواہشات کا اظہار کیا۔
ملاقات میں مسلم لیگ ن اور مسلم لیگ ق کی قیادت کے درمیان آئندہ عام انتخابات میں باہمی تعاون پر بھی بات چیت ہوئی۔
