اسلام آباد :اسلام آباد لاہور موٹروے ایم ٹو نارتھ پر پبلک سروس ٹرانسپورٹ بالخصوص مسافر بسوں کے مسافروں اور عملے سمیت دیگر ٹریفک اور عوام الناس کی قیمتی زندگیوں کو حادثات سے بچانے اور روڈ سیفٹی کی غرض سے نیشنل ہائی ویز اینڈ موٹر وے پولیس کی جانب سے حکمت عملی وضع کی گئی ہے ۔
اسلام آباد سے لاہور کی جانب سفر کرنے والی بسوں کو موٹروے پر پہلے سے مقررہ محفوظ جگہوں پر ٹائم کارڈ جاری کرنے اور سپیڈ چیکنگ کیمروں اور پولیس پٹرول موبائلز آفیسرز کی مدد سے سخت مانیٹرنگ کے ساتھ اب (سالٹ رینج) کلر کہار کے آغاز سے قبل بمقام PSV ہالٹ پوائنٹ ایریا 232 کلومیٹر سائن بورڈ کے قریب محفوظ جگہ پر روک کر آمدہ بسوں کی مناسب تعداد کے گروپ تشکیل دیے جائیں گے۔
موٹر وے پولیس موبائلز کے ہمراہ CONVOYS قافلوں کی صورت میں سالٹ رینج کلر کہار دس کلومیٹر کا فاصلہ طے کروایا جائے گا جبکہ بقیہ سفر کیلئے ایسی تمام بس کمپنیز اور ڈرائیوروں پر نیشنل ہائی ویز اینڈ سیفٹی آرڈیننس کے پہلے سے مروجہ قوانین کا اسی طرز پر اطلاق جاری رہے گا۔
موٹر وے پولیس حکام کے مطابق اس کاوش کے ذریعے موٹر وے اور ہائی ویز بالخصوص سالٹ رینج کلر کہار میں پیش آنے والے حادثات میں نمایاں کمی لانا ممکن ہے ۔
نیشنل ہائی ویز اینڈ موٹر وے پولیس کی جانب سے موٹر وے کے تمام داخلہ پوائنٹس ٹول پلازوں پر باوردی بریفننگ آفیسرز چیکنگ سٹاف چوبیس گھنٹے تین شفٹ میں ڈیوٹی پر موجود رہتے ہیں اور اس مقصد کے لیے سیکٹر ایم ٹو نارتھ کے زیر انتظام مین ٹول پلازہ اسلام آباد داخلی مووی پوائنٹ پر PSV انفارمیشن مینیجمینٹ سنٹر بھی کام کر رہا ہے جس کے ذریعے ایم ٹو موٹر وے پر سفر کرنے والی PSV ٹرانسپورٹ کا ڈیٹا آن لائن مرتب کیا جاتا ہے جس میں گاڑی کی فٹنس پاسنگ روٹ پرمٹ ڈرائیور لائسنس مالک کے کوائف سیٹنگ گنجائش اوور لوڈنگ ٹائرز حفاظتی سیفٹی ابتدائی طبی سامان ھنگامی خروج گیٹ بتیاں اشارے الیکٹرانک آلات سیفٹی کونز کے ساتھ ساتھ موقع پر موجود ڈرائیور اور گاڑی کی ظاہری کنڈیش کی جانچ کی جاتی ہے اور معیار پر پورا نہ اترنے والی بسوں کو جرمانے کے بعد فوری ٹول پلازہ سے آوٹ کر دیا جاتا ہے تاکہ ایسی کسی بھی قسم کی گاڑی کو ممکنہ حادثے یا بریک ڈاؤن سے بچایا جا سکے ۔یہ امر قابل ذکر ہے کہ موٹر وے کے روڈ سیفٹی آگاہی یونٹ کے نمائندگان روزمرہ کی بنیاد پر دیگر تمام اداروں کے ساتھ ساتھ بس ٹرمینلز اور اڈوں پر روڈ سیفٹی کیمپینز لیکچر اور ورکشاپ منعقد کر کےبس ڈرائیورز مالکان اور عوام الناس میں روڈ سیفٹی شعور کو اجاگر کرنے میں اپنا بھرپور کردار ادا کر رہے ہیں اور روڈ سیفٹی آگاہی پمفلٹس اور ریڈنگ میٹریل کی تقسیم FM 95 ریڈیو اور سوشل میڈیا کا صحیح استعمال پبلک میں روڈ سیفٹی شعور کی آبیاری میں اپنا بھرپور کردار ادا کر رہا ہے . مروجہ حکمت عملی سے روڈ یوزرز میں صبروتحمل اور نظم و ضبط کو فروغ ملے گا ۔
