پہلے سلام کر چکا تھا،چیف جسٹس کو سلام نہ کرنے کا غلط تاثر پھیلایا گیا ہے ، جسٹس فائز عیسیٰ

اسلام آباد : سپریم کورٹ کے سینئر ترین جج جسٹس قاضی فائز عیسیٰ نے
کہاہے کہ ان کی طرف سے چیف جسٹس کو سلام نہ کرنے کا غلط تاثر دیا گیا ہے ۔

سوشل میڈیا پر چیف جسٹس پاکستان عمر عطا بندیال سے سلام نہ کرنے سے متعلق زیر گردش ویڈیو پر انہوں نے وضاحتی بیان جاری کیا ہے۔

جسٹس قاضی فائز عیسیٰ نے کہا کہ وفاقی شرعی عدالت کے چیف جسٹس کی حلف برداری کی تقریب کے دوران شرعی عدالت کے چیف جسٹس کی اہلیہ کے پاس گیا اور ان کو مبارکباد دی، شرعی عدالت کے چیف جسٹس اقبال حمیدالرحمان سے ملنے سے قبل چیف جسٹس پاکستان کو ملا تھا، میں پہلے چیف جسٹس پاکستان کو سلام کر چکا تھا۔

انہوں نے کہا کہ کسی نے ویڈیو بنا کر یہ غلط تاثر دیا کہ میں نے چیف جسٹس پاکستان عمر عطا بندیال کو سلام نہیں کیا، غلط خبریں نہ پھیلائی جائیں کیونکہ یہ غیرضروری غلط فہمیاں نقصان کا باعث بنتی ہیں۔

ان کا کہنا تھا یہ بات بالکل غلط ہےکہ میں نے سپریم کورٹ میں ایک الگ گروپ بنایا ہے، قرآن پاک کی آیت ہے کہ خبر پھیلانے سے قبل اس کی صداقت کی تحقیق کر لیا کرو کہ کہیں تم لاعلمی میں کسی کو نقصان نا پہنچا بیٹھو۔

انہوں نےکہا کہ آئین کے تحفظ اور دفاع کے لیے اپنے منصب کے حلف کا پابند ہوں، اپنے حلف کے خلاف کسی چیز کی تائید نہیں کر سکتا۔