اسلام آباد : الیکشن کمیشن نے پنجاب اور کے پی کے میں 14 مئی کو انتخابات کے فیصلے پر نظرثانی کے لئے درخواست دائر کر دی
درخواست میں سپریم کورٹ سے اپنے 4 اپریل کے فیصلے پر نظرثانی کرنے کی استدعا کی گئی ہے۔
درخواست میں کہا گیا ہے کہ انتخابات کی تاریخ دینے کا اختیار عدلیہ کو حاصل نہیں، آئین بنانے والوں نے عدلیہ کو یہ حق نہیں دیا کہ وہ انتخابات کے لیے تاریخ دے، سپریم کورٹ نے پنجاب میں انتخابات کی تاریخ دے کر طے شدہ قانون کو تبدیل کیا، عدالت انتخابات کی تاریخ دینے کی غلطی کو درست کرے، درخواست میں یہ کہا گیا ہے کہ آئینِ پاکستان نے اداروں کے اختیارات کو بالکل واضح کر رکھا ہے، سپریم کورٹ نے پنجاب میں انتخابات کی تاریخ دے کر اپنے ہی طے کردہ اصول کی نفی کی، انتخابی پروگرام کی تبدیلی کا اختیار الیکشن کمیشن کے پاس ہے عدلیہ صرف آئین کی تشریح کر سکتی ہے۔
درخواست میں کہا گیا ہے کہ عدلیہ آئین کو دوبارہ تحریر کرنے کا حق نہیں رکھتی، آئین یا قانون نے سپریم کورٹ کو یہ اختیار نہیں دیا کہ وہ انتخابات کی تاریخ کا تعین کر سکے۔
درخواست میں یہ بھی کہا گیا ہے کہ ملک میں مضبوط جمہوریت کے لیے مضبوط الیکشن کمیشن ضروری ہے۔
