اسلام آباد : سینیٹ نے اپوزیشن کے واک آؤٹ کے دوران قومی اسمبلی اورچاروں صوبائی اسمبلیوں کے الیکشن ایک ساتھ کرانے کی قراردادکی کثرت رائے سے منظوری دے دی۔ ایوان بالا میں اس سلسلے میں سینیٹر طاہر بزنجو، عبدالغفور حیدری اور فیصل سبزواری اوردیگر ارکان نے قواعد معطل کرنے اورقرارداد پیش کرنے کی تحریک پیش کی ۔ ایوان نے تحریک کی منظوری د ی جس کے بعد سینیٹر طاہر بزنجو نے قراردادپیش کی ۔ قرارداد میں کہاگیا ہے کہ معاشی استحکام کےلئےسیاسی استحکام ضروری ہے ، ملک مزید سیاسی عدم استحکام کا متحمل نہیں ہوسکتا۔ پنجاب ملک کا آبادی کے لحاظ سے سب سے بڑا ملک ہے جہاں پر قومی اسمبلی کی سب سے زیادہ نشستیں ہیں، پنجاب میں پہلے انتخابات سے دیگرچھوٹے صوبوں پر منفی اثرات مرتب ہوں گے۔ محاذ آرائی کی بجائے سیاسی استحکام کی ضرورت ہے اس لئے قومی اسمبلی اورچاروں صوبائی اسمبلیوں کے بیک وقت انتخابات کرائے جانے چاہئیں۔ قومی اور صوبائی اسمبلیوں کے اکٹھے انتخابات سے وفاق مضبوط ہوگا۔ ایوان نے کثرت رائے سے قرارداد کی منظوری دیدی۔ چیئرمین سینٹ صادق سنجرانی نے قومی اور صوبائی اسمبلیوں کے انتخابات ایک ساتھ کرانے سے متعلق قرارداد کی منظوری کے بعد دوبارہ ایوان میں پیش کرنے کا اپوزیشن کا مطالبہ مسترد کر دیا۔ سینیٹر طاہر بزنجو اور دیگر ارکان کی پیش کردہ قرارداد کی ایوان کے 60 ارکان نے حمایت کی جبکہ ایک رکن سینیٹر مشتاق احمد نے قرارداد کی مخالفت کی۔ جب قرارداد پیش کی گئی تو اپوزیشن ارکان اس سے پہلے واک آئوٹ کر چکے تھے۔ ایوان میں واپسی کے بعد قائد حزب اختلاف سینیٹر شہزاد وسیم نے کہا کہ ہم واک آئوٹ کر گئے تو اس کے بعد ایوان میں قرارداد لائی گئی ہم اسے قبول نہیں کرتے، قرارداد دوبارہ رائے شماری کیلئے پیش کی جائے، اس دوران اپوزیشن ارکان نے نعرے بازی اور شور شرابہ شروع کر دیا۔ چیئرمین نے کہا کہ جب قرارداد ایک مرتبہ پیش ہو چکی ہے تو اسے دوبارہ نہیں لایا جا سکتا، اپوزیشن کا اعتراض بلاجواز ہے، اپوزیشن ارکان لابی میں ہی موجود تھے، جب قرار داد پیش کی جارہی تھی تو انہیں ایوان میں آ جانا چاہئے تھا، اب میں رولنگ دے چکا ہوں، قرارداد دوبارہ پیش نہیں کی جا سکتی
