اسلام آباد:وزیراعظم کے کوآرڈینیٹر برائے قومی صحت ڈاکٹر مختار بھرتھ نے کہا ہے کہ پاکستان سے پولیو کا مکمل خاتمہ حکومت کی اولین قومی ترجیح ہے، وزیراعظم کی قیادت میں پولیو کے خلاف یہ جنگ پوری قوت اور مستقل مزاجی سے جاری ہے۔
ان خیالات کا اظہار انہوں نے انسداد پولیو مہم کے آغاز کے دوران کیا انہوں نے کہا کہ سال 2025 کی پہلی قومی انسداد پولیو مہم کا باقاعدہ آغاز ہو گیا ہے۔پولیو مہم کے دوران ملک بھر میں 4 کروڑ 50 لاکھ سے زائد بچوں کو پولیو کے قطرے پلائے جائیں گے۔
انہوں نے کہا کہ پولیو ورکرز گھر گھر جاکر اپنی خدمات سرانجام دیں گے ۔ڈاکٹر مختار بھرتے نے والدین سے اپیل کی ہے کہ پولیو ورکرز کا بھرپور ساتھ دیں اور اپنے بچوں کو پولیو کے قطرے لازمی پلوائیں۔پانچ سال سے کم عمر تمام بچوں کو پولیو ویکسین پلوانا والدین کی قومی و اخلاقی ذمہ داری ہے۔انہوں نے کہا کہ پاکستان سے پولیو کا مکمل خاتمہ حکومت کی اولین قومی ترجیح ہے۔
انہوں نے کہا کہ وزیراعظم پاکستان کی ذاتی دلچسپی پولیو کے خاتمے کے لیے حکومتی عزم کی عکاس ہے۔وزیراعظم کی قیادت میں پولیو کے خلاف یہ جنگ پوری قوت اور مستقل مزاجی سے جاری ہے۔
انہوں نے کہا کہ پولیو پروگرام اور توسیعی پروگرام برائے حفاظتی ٹیکہ جات کے مابین ہم آہنگی کو مزید مضبوط کیا جارہا ہے۔ملک بھر میں معمول کے حفاظتی ٹیکہ جات کی کوریج کو بہتر بنانے کے لیے مؤثر اور مربوط اقدامات کیے جا رہے ہیں۔انہوں نے کہا کہ ہمارا بنیادی مقصد بچوں کو پولیو سمیت دیگر مہلک بیماریوں سے محفوظ رکھنا ہے۔
