میلبورن: آسٹریلیا نے پاکستان کو پہلے ون ڈے میں 2 وکٹوں سے ہرا دیا۔
میلبرن کرکٹ گراؤنڈ پر آسٹریلیا نے ٹاس جیت کر پہلے فیلڈنگ کرنےکا فیصلہ کیا۔
پہلے بیٹنگ کرتے ہوئے پاکستان کی ٹیم نے 203 رنز بنائے اور آسٹریلیا کو جیت کے لیے 204 رنز کا ہدف دیا۔
پاکستان کی پہلی وکٹ 3 رنز پر گری جب مچل اسٹارک نے صائم ایوب کو 1 رن پر آؤٹ کر دیا جبکہ دوسری وکٹ 24 رنز پر گری جب عبداللّٰہ شفیق 12 رنز بنا کر آؤٹ ہوئے، ان کو بھی مچل اسٹارک نے آؤٹ کیا۔
پاکستان کی تیسری وکٹ 63 رنز پر گری جب بابر اعظم 37 رنز بنا کر ایڈم زمپا کی گیند پر آؤٹ ہوئے، پاکستان کے چوتھے آؤٹ ہونے والے کھلاڑی کامران غلام تھے، وہ بھی صرف 5 رنز بنا کر پویلین لوٹ گئے، انہیں آسٹریلوی ٹیم کے کپتان پیٹ کمنز نے آؤٹ کیا۔
پاکستان کی پانچویں وکٹ 101 رنز پر گری جب نائب کپتان سلمان علی 12 رنز بنا کر آؤٹ ہوئے جبکہ چھٹی وکٹ 117 رنز پر گری، جب کپتان محمد رضوان 44 رنز بنا کر آؤٹ ہوئے۔
ساتویں وکٹ 148 رنز پر شاہین شاہ آفریدی کی صورت میں گری، وہ 24 رنز بنا کر پویلین لوٹ گئے جبکہ پاکستان کی آٹھویں وکٹ 175 رنز پر گری، جب عرفان خان 22 رنز بنا کر رن آؤٹ ہوئے۔
پاکستان کی نویں وکٹ 183 اور دسویں وکٹ 203 رنز پر گری، حارث رؤف بغیر کوئی رن بنائے جبکہ نسیم شاہ 40 رنز بنا کر آؤٹ ہوئے۔
مچل اسٹارک نے 3، پیٹ کمنز اور ایڈم زمپا نے 2، 2 کھلاڑیوں کو آؤٹ کیا جبکہ شان ایبٹ اور مارنس لیبوشین نے 1، 1 وکٹ حاصل کی۔
جواب میں آسٹریلیا نے 204 رنز کا ہدف 34 ویں اوور میں 8 وکٹوں کے نقصان پر حاصل کر لیا۔
جوش انگلیس 49 اور اسٹیو اسمتھ 44 رنز بنا کر آؤٹ ہوئے جبکہ کپتان پیٹ کمنز نے 32 رنز بنائے اور ناٹ آؤٹ رہے ۔
حارث رؤف نے 3، شاہین شاہ آفریدی نے 2 جبکہ نسیم شاہ اور محمد حسنین نے ایک، ایک وکٹ لی۔
