راولپنڈی: جنوبی وزیرستان کے علاقے انگور اڈہ میں دہشت گردوں سے مقابلے کے دوران شہید ہونے والے بریگیڈیئر مصطفی کمال برکی کی نماز جنازہ بدھ کو ریس کورس راولپنڈی میں ادا کر دی گئی۔ آئی ایس پی آر کے مطابق نماز جنازہ میں صدر مملکت ڈاکٹر عارف علوی، وزیر اعظم میاں محمد شہباز شریف، چیئرمین جوائنٹ چیفس آف سٹاف کمیٹی جنرل ساحر شمشاد مرزا، چیف آف آرمی سٹاف جنرل سید عاصم منیر، ڈی جی انٹر سروسز انٹیلی جنس لیفٹیننٹ جنرل ندیم احمد انجم، حاضر سروس اور ریٹائرڈ فوجی افسران و جوانوں، سرکاری افسران، ارکان پارلیمنٹ اور عوام کی بڑی تعداد نے نماز جنازہ میں شرکت کی۔ افسر کو قوم کے لیے خدمات کے اعتراف میں پورے فوجی اعزاز کے ساتھ آرمی قبرستان میں سپرد خاک کر دیا گیا۔اپنے پورے فوجی کیریئر کے دوران، بریگیڈیئر مصطفی برکی انسداد دہشت گردی کی کارروائیوں کے خلاف سرگرم رہے، کے پی کے اور بلوچستان میں دہشت گردی کے متعدد نیٹ ورکس کو کامیابی سے ختم کیا۔ وہ اے پی ایس حملے 2016 میں ملوث دہشت گرد نیٹ ورکس تک پہنچنے میں مددگارثابت ہوئے تھے۔ قوم ان کی زندگی میں شاندار خدمات اور پاکستان کے لیے دی گئی عظیم قربانی کا اعتراف کرتی ہے۔ آئی ایس پی آر کے مطابق پاکستان کی مسلح افواج اور انٹیلی جنس ایجنسیاں دہشت گردی کی اس لعنت کو ہر قیمت پر ختم کرنے کے عزم کا اعادہ کرتی ہیں۔
