اسحاق ڈار سے چائنہ تھری گورجز کارپوریشن (سی ٹی جی) کے ایگزیکٹو نائب صدر اور چائنا تھری گورجز انٹرنیشنل لمیٹڈ (سی ٹی جی آئی) کے چیئرمین وو شینگ لیانگ کی ملاقات

اسلام آباد۔ نائب وزیراعظم اور وزیر خارجہ سینیٹر محمد اسحاق ڈار سے چائنہ تھری گورجز کارپوریشن (سی ٹی جی) کے ایگزیکٹو نائب صدر اور چائنا تھری گورجز انٹرنیشنل لمیٹڈ (سی ٹی جی آئی) کے چیئرمین وو شینگ لیانگ نے بیجنگ میں ملاقات کی۔
ملاقات میں نائب وزیراعظم نے حکومت پاکستان کے اصلاحاتی ایجنڈے پر روشنی ڈالی اور براہ راست غیر ملکی سرمایہ کاری بالخصوص انفراسٹرکچر کی ترقی اور قابل تجدید توانائی کے شعبوں میں مواقعوں کا ایک جائزہ پیش کیا۔
ترجمان دفتر خارجہ کے مطابق نائب وزیراعظم نے کروٹ اور جھمپیر سمیت پاکستان میں چائنہ تھری گورجز کارپوریشن کے قابل تجدید توانائی کے منصوبوں کو سراہا۔ انہوں نے کہا کہ قابل تجدید توانائی پاکستان میں نئی حکومت کے ترجیحی شعبوں میں شامل ہے۔
نائب صدر چائنہ تھری گورجز کارپوریشن نے پاکستان کے ساتھ چائنہ تھری گورجز کارپوریشن کی مسلسل وابستگی کا اعادہ کیا اور آزاد جموں و کشمیر میں کوہالہ اور محل ہائیڈرو پاور پراجیکٹس جیسے جاری منصوبوں کی تکمیل میں تیزی لانے کے عزم کا اظہار کیا۔