اسلام آباد:سپیکر قومی اسمبلی سردار ایاز صادق کی صدارت میں پارلیمانی رہنماؤں کااہم اجلاس( آج) پیر کو سہ پہر 3 بجے پارلیمنٹ ہاؤس میں منعقد ہو گا۔
اجلاس میں صدر مملکت کے خطاب پر شکریہ کی تحریک کیلئے دنوں کا تعین اور آئندہ آنے والے بجٹ اجلاس پر تبادلہ خیال کیا جائے گا۔
اجلاس میں 16وین قومی اسمبلی کے پہلے پارلیمانی سال کے کلینڈر کو طے کرنے سے متعلق امور کو بھی زیر غور لایا جائے گا۔
اجلاس میں قومی اسمبلی میں موجود سیاسی جماعتوں کے پارلیمانی رہنماؤں/چیف وہپس کو مدعو کیا گیا ہے۔
اجلاس میں وفاقی وزیر برائے قانون و انصاف و پارلیمانی امور اعظم نذیر تارڑ ،وفاقی وزیر برائے مذہبی امور چوہدری سالک حسین، ممبران قومی اسمبلی طارق فضل چوہدری، ملک عامر ڈوگر، اعجاز حسین جاکھرانی، سید امین الحق، نور عالم خان، گل اصغر خان اور خالد حسین مگسی کو مدعو کیا گیا ہے۔
