لاہور :سپیکر پنجاب اسمبلی ملک احمد خان نے سپریم کورٹ کے حکم پر مخصوص نشستوں پرحلف اٹھانے والے 27 ارکان کی رکنیت معطل کردی
سپریم کورٹ نے سنی اتحاد کونسل کے کوٹے کی نشستیں دیگر جماعتوں کو دینے کا فیصلہ معطل کیا تھا۔
سپیکر ملک محمد احمد خان کی زیر صدارت پنجاب اسمبلی کا اجلاس ہوا، جس میں سپیکر نے پنجاب اسمبلی کی 27 مخصوص نشستیں معطل کیں، مسلم لیگ ن کے 23 ارکان کی رکنیت معطل ہوئ ہے، جس کے بعد ایوان میں اراکین کی تعداد 203 رہ گئی ہے۔
معطل ارکان پنجاب اسمبلی میں 24 خواتین اور 3 اقلیتی ارکان شامل ہیں، معطل خواتین ارکان میں ن لیگ کی 21، پیپلز پارٹی، آئی پی پی اور ق لیگ کی ایک ایک رکن شامل ہیں، جبکہ معطل اقلیتی ارکان میں ن لیگ کے 2 اور پیپلز پارٹی کا 1 رکن شامل ہے۔
سپریم کورٹ کے فیصلے پر عمل درآمد کے نتیجے میں پنجاب اسمبلی میں ن لیگ کے 23 اور پیپلز پارٹی کے 2 ووٹ کم ہوگئے ہیں، مسلم لیگ ق اور استحکام پاکستان پارٹی کا ایک ایک ووٹ بھی کم ہوا ہے۔
یاد رہے کہ سپریم کورٹ نے سنی اتحاد کونسل کی مخصوص نشستوں سے متعلق اپیل سماعت کے لیے مقرر کرتے ہوئے مخصوص نشستوں سے متعلق پشاور ہائی کورٹ کا فیصلہ معطل کردیا تھا۔
