وزیراعظم شہباز شریف اور شہزادہ محمد بن سلمان کا دو طرفہ تعلقات کو مزید مضبوط بنانے کے عزم کا اعادہ

مکہ مکرمہ:وزیراعظم شہباز شریف اور سعودی عرب کے ولی عہد اور وزیراعظم شہزادہ محمد بن سلمان نے پاکستان اور سعودی عرب کے تعلقات کو مزید مضبوط بنانے کے عزم کا اعادہ کیا ہے۔
وزیراعظم محمد شہباز شریف نے وفد کے ہمراہ سعودی عرب کے ولی عہد اور وزیراعظم شہزادہ محمد بن سلمان کی خصوصی دعوت پر افطار ڈنر میں شرکت کی۔ افطار کے بعد دو طرفہ ملاقات ہوئی ۔ وزیراعظم اور سعودی ولی عہد کے درمیان ون آن ون ملاقات بھی ہوئی۔ وزیراعظم نے خادم حرمین شریفین شاہ سلمان بن عبدالعزیز کی صحت کے لیے دعا اور نیک خواہشات کا اظہار کیا۔ وزیراعظم نے سعودی حکام کی جانب سے اپنے اور ان کے وفد کے پرتپاک استقبال پر شکریہ ادا کیا۔ دونوں رہنماؤں نے دیرینہ برادرانہ تعلقات پر اطمینان کا اظہار کیا۔ دونوں رہنماؤں کا دو طرفہ تعلقات کو مزید مضبوط بنانے کے عزم کا اعادہ کیا۔