اسلام آباد:سپریم کورٹ میں فوجی عدالتوں میں سویلینز افراد کے ٹرائلز کے خلاف انٹرا کورٹ اپیلوں کی سماعت کے موقع پر عدالت نے زیر حراست 103 افراد کی تفصیلات طلب کرتے ہوئے کیس کی سماعت جمعرات 28 مارچ 2024ء تک کیلئے ملتوی کر دی۔
جسٹس امین الدین خان کی سربراہی میں عدالت عظمی کے 6 رکنی۔لارجر بنچ نے پیر کو یہاں فوجی عدالتوں میں سویلینز افراد کے ٹرائلز کو کالعدم قرار دینے کے فیصلہ کے خلاف اپیلوں پر سماعت کی۔
دوران سماعت سابق چیف جسٹس سپریم کورٹ جواد ایس خواجہ کے وکیل خواجہ احمد حسین نے کہا کہ چھ رکنی لارجر بنچ پر اعتراض ہے۔ خیبر پختونخواحکومت کے وکیل کی جانب سے فوجی عدالتوں میں سویلنز کے ٹرائلز کالعدم قرار دینے کے خلاف دائر اپیلیں واپس لینے کی استدعا کرتے ہوئے صوبائی کابینہ کی قرارداد عدالت میں پیش کر دی۔
عدالت نے قرار دیا کہ کابینہ کی قرارداد پر اپیلیں واپس نہیں کر سکتے۔ مناسب ہو گا کہ اپیلیں واپس لینے کیلئے باضابطہ درخواست دائر کی جائے۔
عدالت نے اٹارنی جنرل سے زیر حراست 103 افراد کی تفصیلات طلب کرتے ہوئے استفسار کیا کہ بتایا جائے کہ کتنے ملزمان کو کتنی سزائیں ہوئیں؟۔ یہ بھی بتایا جائے کہ کتنے ملزمان بری ہوئے ہیں؟، اور زیر حراست 103 افراد میں سے کتنے افراد کی بریت بنتی ہے۔ بعد ازاں سہریم کورٹ نے زیر حراست افراد کے حوالہ سے تفصیلات طلب کرتے ہوئے
کیس کی مزید سماعت جمعرات 28 مارچ 2024ء تک کیلئے ملتوی کر دی۔
