حد بندیوں بارے الیکشن کمیشن کا نوٹیفکیشن مسترد ، قانونی و آئینی راستہ اختیار کریں گے، چوہدری پرویز الٰہی
وزیر اعلیٰ پنجاب چودھری پرویز الٰہی کے زیر صدارت اعلیٰ سطح کا مشاورتی اجلاس ہوا، اجلاس میں سپیکر پنجاب اسمبلی محمد سبطین خان، سینئر صوبائی وزیر میاں اسلم اقبال، صوبائی وزراء راجہ بشارت، میاں محمودالرشید اور ایم این اے بریگیڈئر (ر) اعجاز شاہ نے شرکت کی۔
اجلاس میں یونین کونسلوں کی حد بندیوں کے بارے میں الیکشن کمیشن کے نوٹیفکیشن کا تفصیلی جائزہ لیا گیا، اجلاس میں اتفاق رائے سے یونین کونسلوں کی حد بندیوں کے بارے میں الیکشن کمیشن کے یکطرفہ نوٹیفکیشن کو مسترد کر دیا گیا، اجلاس میں طے پایا کہ یونین کونسلوں کی حد بندیوں کا یکطرفہ نوٹیفکیشن قانونی تقاضوں کو پورا نہیں کرتا، پنجاب حکومت الیکشن کمیشن کے اس یکطرفہ نوٹیفکیشن کو تسلیم نہیں کرتی۔
چودھری پرویز الٰہی نے کہا کہ الیکشن کمیشن کا یکطرفہ نوٹیفکیشن عوامی رائے کو بلڈوز کرنے کی کوشش ہے، یونین کونسلوں کی حد بندیوں کے حوالے سے مقامی لوگو ں اور انتظامیہ کو شامل نہیں کیا گیا، الیکشن کمیشن کے یکطرفہ نوٹیفکیشن کے بارے میں قانونی اور آئینی راستہ اختیار کیا جائے گا
وزیر اعلیٰ پنجاب نے کہا کہ بلدیاتی ادارے جمہوریت کی نرسری ہوتے ہیں الیکشن کمیشن کے یکطرفہ نوٹیفکیشن کے تحت حد بندیاں ہوئیں تو کسی صورت مضبوط مقامی حکومتیں وجود میں نہیں آسکتیں۔
