اسلام آباد :بجلی کی قیمت کو پر لگ گئے ، تھری فیز میٹر کا پیک آور ریٹ 50 روپے فی یونٹ سے بڑھ گیا ۔
بجلی کے پیک آورز کے دورانیہ میں 2گھنٹے کا اضافہ کر دیا گیا،پیک آورز شام 6تا رات 10کی بجائے شام 5سے رات11بجے رات تک ہوں گے۔
تھری فیز میٹر پیک آورز کے بل 34روپے کی بجائے 50روپے فی یونٹ ادا کرنا ہونگے ،آئی ایم ایف کے ساتھ ہونے والے معاہدے کی شرائط پر مکمل عملدرآمد کرتے ہوئے حکومت ملک بھر کی بجلی تقسیم کرنے والی کمپنیوں کے ذریعے بجلی کے صارفین سے 3ہزار 281ارب روپے حاصل کر پائے گی۔
دریں اثناء حکومت نے آئل اینڈ گیس ریگولیٹری اتھارٹی کو گیس کے نرخوں میں اضافے کا چارٹ بنانے کی بھی ہدایت کی ہے۔
آئل اینڈ گیس ریگولیٹری اتھارٹی نے گیس کی قیمتوں میں 45سے 50فیصد اضافے کا تعین کیا ہے۔
پاور ڈویژن نے بجلی کے پیک آورز 6بجے شام سے 10بجے سے دو گھنٹے بڑھا دیئے ہیں۔ شام چھ کی بجائے 5بجے سے پیک آور شروع ہونگے اور رات دس بجے کی بجائے رات 11بجے تک پیک آور کا اطلاق ہو گا۔
بجلی کا فی یونٹ تھری فیز میٹر نصب کرانے والوں سے 34کی بجائے اب 50روپے فی یونٹ پیک ٹائم میں وصول ہوا کریگا۔
ٹائم آف یوز میٹر کے صارفین 49روپے 35پیسے فی یونٹ پیک آور شام 5سے رات 11بجے تک کے بل کی ادائیگی کیا کرینگے اور پیک آور کے بعد رات 11بجے سے اگلی شام 5بجے تک آئوٹ آف پیک آورز 33روپے تین پیسے فی یونٹ ادا کیا کرینگے۔
کمرشل صارفین جن کے تھری فیز میٹر ہیں اور گھریلو صارفین جنہوں نے تھری فیز میٹر اے سی وغیرہ کیلئے لگوا رکھے ہیں اُنہیں یکم جولائی 2023ء سے نئے مقرر کردہ پیک آورز کے ریٹ پر ادائیگی کرنا ہو گی۔
