اسلام آباد۔صدر عارف علوی نے کہا ہے کہ ہے کہ عمران خان کو 9 مئی کے واقعات کی کھل کر مذمت کرنی چاہیے،ان واقعات میں ملوث افراد کے خلاف کارروائی بھی ہونی چاہیے۔
ایک انٹرویو میں ڈاکٹر عارف علوی نے کہا کہ کارروائی میں انسانی حقوق کا خیال رکھنا چاہیے، مارپیٹ نہیں ہونی چاہیے، ملوث افراد کو قانون کے مطابق سزا دینی چاہیے۔انہوں نے کہا کہ ان واقعات کی آزادانہ تحقیقات ہونی چاہیے، آرمی ایکٹ پر مقدمات سے متعلق سیاست دانوں کو غور کرنا ہوگا، پیپلزپارٹی کی ماضی میں حکومت نے بہترین کام کیا کہ آرمی ایکٹ کے تحت سزائیں ختم کیں،سپریم کورٹ اور پارلیمنٹ نے بھی آرمی ایکٹ کے کچھ فیصلے ختم کیے۔انہوں نے کہا کہ عمران خان نے آرمی چیف جنرل عاصم منیر کی تقرری کی مخالفت نہیں کی تھی، عمران خان نے کہا تھا کہ جنرل باجوہ کو کہہ دیں جس کو ادارہ آرمی چیف بنائے قبول کریں ۔ایک میٹنگ میں پرویز خٹک، شاہ محمود اور اسد عمر ساتھ تھے تب بھی یہی بات ہوئی، عمران خان طے کرچکے تھے کہ انہیں آرمی چیف کی تقرری پر کوئی اعتراض نہیں۔ ایک سوال کے جواب میں انہوں نے کہا کہ بینظیر بھٹو کی شہادت کے بعد بہت نقصان ہوا، آصف زرداری کے پاکستان کھپے کے نعرے کے بعد مسئلہ حل ہوا، فوج میری ہے ، جمہوری قوتیں میری ، عوام میرے ہیں میں ان کے ساتھ ہوں، احتجاج کرنا ہے تو قانون کے دائرہ میں رہیں۔انہوں نے کہا کہ سعودی ولی عہد محمد بن سلمان نے کئی دہائیوں کی دشمنی کو ختم کیا، یہ بڑا کام ہے، کسی کو ختم نہیں کرسکتے، غصے میں ہوں تو خراب آئیڈیاز جنم لیتے ہیں، سیاست دان کہہ رہے ہیں کہ ایمرجنسی کوئی آپشن نہیں یہ اچھی بات ہے، جہاں ادارے ناکام ہوتے ہیں وہاں قوم تباہ ہوجاتی ہے، افغانستان میں بھی اور کوئی بات نہیں ادارے تباہ ہیں۔ انہوں نےکہا کہ انسانی حقوق سے متعلق دنیا پاکستان کو دیکھ رہی ہے۔ انہوں نےکہاکہ میں چاہتا ہوں کہ الیکشن جلدی ہو اس میں جو بھی اکثریت لیکر آئے وہ حکومت کرے۔
