مظفر آباد : آزاد کشمیر کے سابق وزیراعظم سردار تنویر الیاس کی سزا کے خلاف اپیل کی سماعت کل ہو گی ،آزاد کشمیر سپریم کورٹ کا فل بینچ درخواست کی سماعت کرے گا۔آزاد کشمیر ہائیکورٹ نے گزشتہ روز سردار تنویر الیاس کو توہین عدالت پر سزا سُنا کر نااہل کیا تھا جس کے خلاف انہوں نے سپریم کورٹ میں اپیل دائر کی تھی۔آزاد کشمیر سپریم کورٹ کے چیف جسٹس راجہ سعید اکرم نے سردار تنویر الیاس کے وکلا پر سخت اظہار برہمی کرتے ہوئے کہا کہ آپ نے اس اپیل میں سابق وزیراعظم کو موجودہ وزیراعظم کیوں لکھا؟،سردار تنویر الیاس کے وکیل نے کہا کہ جناب عالی اس لفظ کو سابق وزیر اعظم ہی تصور کیا جائے۔
چیف جسٹس راجہ سعید نےکہا کہ ہم کیسے اسے سابق پڑھیں، یہ سپریم کورٹ ہے کوئی مذاق نہیں، جب تک سپریم کورٹ کی طرف سے کوئی ایکشن نہیں ہوتا، ہائی کورٹ کا فیصلہ برقرار رہےگا، نئی اپیل دوبارہ جمع کرائیں ،بعد ازاں سردار تنویر الیاس کے وکلا کی جانب سے نئی درخواست دائر کر دی گئی جسے م کل سماعت کے لیے مقرر کر دیا گیا ہے۔
