اسلام آباد: فیڈرل بورڈ آف ریونیو (ایف بی آر) نے نان فائلرز کی کیٹیگری ختم کرکے ٹیکس نہ دینے والوں پر15پابندیاں لگانے کا فیصلہ کیا ہے جن میں سے 5 ابتدائی طور پر لگائی جائیں گی جن میں جائیداد، گاڑیوں، بین الاقوامی سفر ، کرنٹ کائونٹ کھولنے اور میوچل فنڈز میں سرمایہ کاری پرپابندیاں شامل ہیں۔ حکومت نے جدید مشین لرننگ اور الگورتھمز کے ذریعے نان فائلرز کی شناخت کا فیصلہ کیا ہے۔ اسٹیٹ بینک کے ساتھ مل کر ایسے افراد کی نگرانی کی جائے گی جن کی آمدنی کی سطح ان کے لین دین کی مقدار کے ساتھ مطابقت نہیں رکھتی، وزیراعظم نے منظوری دیدی، آرڈیننس لایاجائےگا، چیئر مین ایف بی آر نے بتایا ہے کہ بینک چیک متبادل کرنسی بن چکا،اسےمحدود کیاجائیگا،پچھلے سال نان فائلرز سے صرف 25 ارب روپے فیس کی مد میں جمع ہوئے، چیئرمین ایف بی آرصنعتکاروں نے آٹو میشن کی حمایت کی ہے تاہم ان کا موقف ہے کہ اگر زراعت پر ٹیکس نہ لگاتو ٹیکس ٹوجی ڈی پی تناسب جمود کا شکاررہے گا۔تفصیلات کے مطابقمنگل کوایف بی آر نے نان فائلرز کو نشانہ بنانے کے لیے متعدد پابندیاں متعارف کرانے کا اعلان کیا تاکہ ٹیکس کمپلائنس کو بڑھایا جا سکے اور ٹیکس بیس کو وسیع کیا جا سکے۔ نان فائلر کیٹیگری کو ختم کر دیا جائے گا۔ابتدائی پابندیوں میں جائیداد کی خریداری، گاڑیوں کی خریداری، میوچل فنڈز میں سرمایہ کاری، کرنٹ اکاؤنٹس کھولنے اور بین الاقوامی سفر (مذہبی سفر کے علاوہ) شامل ہیں۔ حکومت نان فائلر کیٹیگری کو ختم کر رہی ہے، جس کا مطلب ہے کہ وہ افراد جو پہلے ان لین دین پر ٹیکس ادا کرنے سے بچنے کے لیے ایک معمولی فیس ادا کرتے تھے، اب ایسا نہیں کر سکیں گے۔ایف بی آر کے چیئرمین راشد محمود لنگڑیال نے انکشاف کیا کہ ٹیکس ریٹرن جمع نہ کروانے والے افراد کے لیے 15 مخصوص سرگرمیوں پر پابندی عائد کی جائے گی، جن میں ابتدائی طور پر پانچ کلیدی شعبوں پر توجہ مرکوز کی جائے گی۔یہ اقدامات ایف بی آر کے تبدیلی کے منصوبے کا حصہ ہیں، جسے وزیر اعظم کی منظوری مل چکی ہے۔ایک سرکاری عہدیدار نے دی نیوز کو تصدیق کی کہ اس اقدام کو ایک آرڈیننس کے ذریعے نافذ کیا جائے گا، اور ایف بی آر پہلے ہی اس کے قواعد پر کام کر رہا ہے اور قانون کی وزارت کو اس عمل میں شامل کر رہا ہے۔چیئرمین ایف بی آر نے نان فائلرز کے تصور کو تنقید کا نشانہ بناتے ہوئے کہا کہ ایسی درجہ بندیاں دنیا بھر میں نہیں پائی جاتیں اور انہیں ختم کر دینا چاہیے اورتوجہ ٹیکس کمپلائنس کرنے والے اور نہ کرنے والے افراد پر مرکوز ہونی چاہیے۔”ہم جدید مشین لرننگ اور الگورتھمز کے ذریعے نان فائلرز کی شناخت کریں گے،” انہوں نے کہا۔ انہوں نے مزید کہا کہ پچھلے سال نان فائلرز سے صرف 25 ارب روپے فیس کی مد میں جمع ہوئے، جب کہ ان افراد سے ممکنہ ٹیکس ریونیو ابھی بھی وصول نہیں کیا جا سکا۔نئی پالیسیوں کے تحت، نان فائلرز کو روایتی بینک اکاؤنٹس کھولنے سے روکا جائے گا، سوائے کم آمدنی والے افراد کے بنیادی اکاؤنٹس کے۔ اسمگلنگ کے خلاف کارروائی کے لیے، ایف بی آر ملک بھر میں اہم داخلی مقامات پر آٹومیشن اور افرادی قوت کو بڑھا رہا ہے۔راشد لنگڑیال نے کہا، ’’یہ اقدامات نان فائلرز کے لیے رکاوٹیں پیدا کرنے اور ٹیکس دہندگان میں کمپلائنس کو فروغ دینے کے لیے بنائے گئے ہیں۔ایف بی آر کے چیئرمین نے بینک چیک کے استعمال کو محدود کرنے کے اقدامات کا بھی اعلان کیا، جو مختلف اداروں میں متبادل کرنسی بن چکا ہے۔ انہوں نے بتایا کہ اسٹیٹ بینک کے ساتھ مل کر ایسے افراد کی نگرانی کی جائے گی جن کی آمدنی کی سطح ان کے لین دین کی مقدار کے ساتھ مطابقت نہیں رکھتی، جس سے کمرشل بینکوں کو فرق رپورٹ کرنے کی سہولت ملے گی۔وزیر مملکت برائے خزانہ علی پرویز ملک نے اسٹیک ہولڈرز کے ساتھ زیادہ جامع مشاورتی عمل کی طرف منتقلی پر زور دیا۔ انہوں نے کہا کہ ایف بی آر ڈیجیٹلائزیشن کے اقدامات نافذ کر رہا ہے تاکہ ٹیکس سے مستثنیٰ شعبوں کو رسمی شکل دی جا سکے اور کمپلائنس کو فروغ دیا جا سکے، جبکہ ٹیکس چوری کے خلاف سزا دینے والے اقدامات بھی متعارف کرائے جا رہے ہیں، جن میں کم انوائسنگ اور غلط اعلامیہ بھی شامل ہیں۔”ہم نے ایک سال میں 3.5 کھرب روپے کی جارحانہ ٹیکسیشن کی،” انہوں نے کہا، یہ نوٹ کرتے ہوئے کہ ٹیکس سے جی ڈی پی کا تناسب کئی سالوں سے جمود کا شکار ہے۔ ہم اپنا ٹیکس بیس بڑھانا چاہتے ہیں اور ٹیکس نہ دینے والوں کے پیچھے جائیں گے۔راشدلنگڑیال نے ان خدشات کا اظہار کیا کہ اگر ان مسائل کو حل نہ کیا گیا تو موجودہ ٹیکس دہندگان کو اضافی ٹیکسوں کا بوجھ اٹھانا پڑے گا۔بعد میں صنعت کاروں نے ایف بی آر کی ڈاکومینٹیشن اور آٹومیشن کی کوششوں کی حمایت کی۔ انڈسٹری کے ایک نمائندے عارف حبیب نے کہا کہ اگر زراعت کے شعبے پر ٹیکس نہ لگایا گیا تو ٹیکس سے جی ڈی پی کا تناسب جمود کا شکار رہے گا
