لاہور:وزیراعظم محمد شہباز شریف نے آج پیر کے روزقصور میں لکی مروت میں شہید کیپٹن محمد فراز الیاس کی نماز جنازہ میں شرکت کی۔ ۔وزیر اعظم محمدشہباز شریف نے کیپٹن محمد فراز الیاس کی میت کو کندھا بھی دیا۔
نماز جنازہ میں وفاقی وزیراطلاعات و نشریات عطا ءاللہ تارڑ، انسپکٹر جنرل،پنجاب سمیت دیگر اعلیٰ افسران و جوانان نے بھی شرکت کی۔بعد ازاں جاں بحق کیپٹن کے لواحقین سے بات کرتے ہوئے شہباز شریف نے شہید کے گاؤں کو ماڈل ویلیج بنانے کا اعلان کرتے ہوئے گاؤں کا نام فراز الیاس شہید کے نام سے بھی منسوب کردیا۔ وزیراعظم شہباز شریف نے کہا کہ قوم کو اپنے بہادر سپوتوں پر فخر ہے ۔ بزدل دہشت گرد ہمارے امن کے عزم کو متزلزل کرنے میں کامیاب نہیں ہو سکیں گے۔وزیراعظم نے کہا کہ اللہ تعالیٰ کسی کسی کو یہ عظیم مقام بخشتا ہے، قرآن مجید میں فرمان ہے شہید کو مردہ مت کہو یہ زندہ ہیں، شہید کیپٹن فراز الیاس سارے خاندان کیلئے جنت میں مقام بنا گئے۔انہوں نے کہا کہ پاک فوج کے ہزاروں جوانوں نے جان کا نذرانہ پیش کیا، یقین دلاتا ہوں کہ شہید کی عظیم قربانی رائیگاں نہیں جائے گی، شہید کا خون ضرور رنگ لائے گا۔
شہباز شریف نے کہا کہ وطن کی خاطر جان دینے والوں کی قربانیاں کو فراموش نہیں کر سکتے، ارض پاک سے دہشت گردوں کو ختم کر کے ہی دم لیں گے۔۔بعد ازاں لکی مروت حادثے میں شہید ہونے والے کیپٹن محمد فراز الیاس کی مکمل فوجی اعزاز کےساتھ تدفین کر دی گئی۔ وزیر اعظم نے شہید کی قبر پر حاضری دی ، فاتحہ خوانی کی اور قبر پر پھول رکھےاس موقع پر وزیراعظم نے شہید کی بلندی درجات کے لیے دعاء کی۔قصور کے گاؤں رائے کلاں سے تعلق رکھنے والے 26 سالہ شہید کیپٹن محمد فراز الیاس نے لکی مروت کے قریب جرات اور بہادری کا مظاہرہ کرتے ہوئے فرائض کی ادائیگی کے دوران جام شہادت نوش کیا تھا ۔
