مذہبی ہم آہنگی کے فروغ کیلئے مسلم و مسیحی مذہبی رہنماوں کا کردارقابل تعریف ہے، چوہدری سالک حسین

اسلام آباد: وفاقی وزیر مذہبی امور چوہدری سالک حسین نے کہا ہے کہ
پاکستان میں مذہبی ہم آہنگی کے فروغ کیلئے مسلم و مسیحی مذہبی رہنماوں کا کردارقابل تعریف ہے۔
گذشتہ روز سرگودھا میں توہین مذہب کے مبینہ الزام اور اس کے نتیجے میں پیدا ہونے والی بدامنی پر ردعمل دیتے ہوئے وفاقی وزیر مذہبی امور کا کہنا تھا کہ کسی بھی افواہ پر فوری ردعمل دینا دین کی تعلیم نہیں۔
علاقے میں قیام امن اور حالات قابو میں رکھنے میں آرچ بشپ راولپنڈی ، آرچ بشپ لاہور، چیئرمین مرکزی رویت ہلال کمیٹی ، چیئرمین پاکستان علما ءکونسل سمیت دیگر قومی و مقامی علماء کرام اور مسیحی مذہبی رہنماوں کا موثر کردار قابل تعریف ہے۔ نیز پنجاب پولیس اور دیگر قانون نافذ کرنے والے اداروں کا امن برقرار رکھنے کیلئے فوری ایکشن بھی سراہے جانے کے قابل ہے ۔ سیکرٹری مذہبی امور کے احکامات کے مطابق وزارت کے اعلیٰ افسران مقامی انتظامیہ ، مذہبی رہنماوں اور مقامی امن کمیٹیوں سے مسلسل رابطے میں ہے۔
انہوں نے کہا کہ سوشل میڈیا پر اس واقعہ کی بنیاد پر شرانگیزی اور مذہبی منافرت پھیلانے نیز پاکستان کو بدنام کرنے کی کوشش کو مل کر ناکام بنانا ہو گا۔
انہوں نے مزید کہا کہ پاکستان میں توہین مذہب اور منافرت کے سدباب کیلئے مناسب قانون موجود ہے،قانون ہاتھ میں لینے والے عناصر کو نتائج کا سامنا کرنا ہو گا ریاست پاکستان بلا تفریق مذہب تمام شہریوں کی سلامتی کی ضامن ہے. چوہدری سالک حسین کا کہنا تھا کہ ہمارا مذہب، آئینِ پاکستان اور بابائے قائداعظم کے فرمودات ہمارے لیے مشعل راہ ہیں۔ پاکستان میں بسنے والے سرکردہ مذہبی راہنما معاشرے میں ہم آہنگی کے فروغ کیلئے موثر کردار ادا کر رہےہیں۔