اسلام آباد:ازبکستان کے وزیرخارجہ بختیار سیدوف دو روزہ پاکستان پر پاکستان پہنچ گئے۔ دفتر خارجہ آمد پر نائب وزیراعظم اور وزیر خارجہ محمد اسحاق ڈار نے معزز مہمان کا استقبال کیا۔ دفتر خارجہ کے مطابق ازبکستان کے وزیر خارجہ پاکستان میں قیام کے دوران وزیراعظم شہباز شریف سے بھی ملاقات کریں گے۔ مذاکرات میں دوطرفہ اقتصادی و تجاری تعلقات کو مزید فروغ دینے پر خصوصی توجہ مرکوز رہے گی۔
بعد ازاں نائب وزیراعظم اور وزیر خارجہ سینیٹر اسحاق ڈار اور ازبکستان کے وزیر خارجہ بختیار سیدوف کے درمیان دفتر خارجہ میں ون آن ون ملاقات ہوئی۔اسحاق ڈار نے بختیار سیدوف کو پاکستان آمد پر خوش آمدید کہا۔ اس موقع پر نائب وزیراعظم اور وزیر خارجہ سینیٹر اسحاق ڈار نے کہا کہ دونوں ملکوں کے درمیان مضبوط دوستانہ تعلقات ہیں۔ انہوں نے کہا کہ پاکستان ازبکستان کے ساتھ تجارت ، اقتصادی میدان سمیت مختلف شعبوں میں تعلقات کو بڑھانا چاہتا یے۔ ازبکستان کے وزیر خارجہ بختیار سیدوف نے اس موقع پر گفتگو کرتے ہوئے کہا کہ پاکستان آکر بہت خوشی ہوئی ہے، پاکستان ہمارے لئے اپنے دوسرے گھر کی مانند ہے۔ ازبک وزیر خارجہ نے کہا کہ پاکستان کے ساتھ تعلقات کو بہت اہمیت دیتے ہیں۔
