آرمی چیف اور ابراہیم رئیسی کاعلاقائی استحکام اور اقتصادی خوشحالی کے لیےدوطرفہ تعاون کو فروغ دینے پر اتفاق

راولپنڈی :ایران کے صدر ابراہیم رئیسی نے پاک فوج کے سربراہ جنرل سید عاصم منیر سےملاقات کی۔دونوں فریقوں نے علاقائی استحکام اور اقتصادی خوشحالی کے لیے مشترکہ کوشش کرتے ہوئے دوطرفہ تعاون کو فروغ دینے کی ضرورت پر اتفاق کیا۔آئی ایس پی آر کے مطابق بات چیت میں بنیادی طور پر باہمی دلچسپی کے امور خاص طور پر علاقائی امن، استحکام اور سرحدی سلامتی پر توجہ مرکوز کی گئی۔ پاک فوج کے سربراہ جنرل سید عاصم منیرنے پاک ایران سرحد کو "امن اور دوستی کی سرحد” قرار دیتے ہوئےسرحد کے ساتھ بہتر کوآرڈینیشن کی ضرورت پر زور دیا تاکہ دہشت گردوں کو دونوں پڑوسی ممالک کے درمیان دیرینہ برادرانہ تعلقات کو خطرے میں ڈالنے سے روکا جا سکے۔ایران کے صدر ابراہیم رئیسی نے اس بات پر زور دیا کہ دونوں مسلح افواج کے درمیان تعاون کو فروغ دے کر پاکستان اور ایران دونوں اقوام اور خطے کے لیے امن و استحکام حاصل کر سکتے ہیں۔