اسلام آباد : وزیراعظم کے عہدے کے لئے مسلم لیگ ن اور اتحادی جماعتوں کے امیدوار شہباز شریف اور سنی اتحاد کونسل کے نامزد امیدوار عمر ایوب خان کے کاغذات نامزدگی درست قرار دے دیے گئے۔
وزارت عظمیٰ کے لئے محمد شہباز شریف کے لیے 7 جبکہ عمر ایوب کے لیے 4کاغذات نامزدگی جمع کرائے گے۔
محمد شہباز شریف کے کاغذات نامزدگی جمع کرانے والوں میں ممبر قومی اسمبلی خواجہ آصف، سید خورشید شاہ، احسن اقبال، سردار محمد یوسف،عطا تارڑ، عون چوہدری، طارق بشیر چیمہ، حنیف عباسی، رانا تنویر، رومینہ خورشید عالم شیزہ فاطمہ خواجہ اور سینیٹر اسحاق ڈار شامل تھے۔
عمر ایوب کے کا غذات نامزدگی سابق اسپیکر قومی اسمبلی اسد قیصر، ملک محمد عامر ڈوگر، علی محمد، بیریسٹر گوہر خان نے جمع کرائے۔
وزارت عظمیٰ کے کاغذات نامزدگی سیکرٹری جنرل قومی اسمبلی طاہر حسین نے وصول کیے۔
اس موقع پر اسپیشل سیکرٹری قانون سازی قومی اسمبلی محمد مشتاق اور اسپیشل سیکرٹری سید شمعون ہاشمی بھی موجود تھے۔
کاغذات نامزدگی کی جانچ پڑتال 3 بجے کی گئ دونوں امیدواروں کے تجویز اور تائید کنندگان کی موجودگی میں جانچ پڑتال کی گئی اور بعد ازاں کاغذات نامزدگی کو درست قرار دے دیا گیا وزیراعظم کے انتخاب کے لیے پولنگ کل قومی اسمبلی ہال میں ہوگی اور وزیراعظم کا انتخاب ایوان میں ڈویژن کے ذریعے ہوگا۔
